Məlumat

Yekun tövsiyə ML qiymət proqnozunun İSTİQAMƏTİNƏ əsaslanır: model 7 gün ərzində qiymətin qalxacağını gözləyirsə AL, düşəcəyini gözləyirsə SAT, aydın hərəkət görmürsə GÖZLƏ.

• Proqnoz +3%-dən yuxarıdırsa → AL
• Proqnoz −3%-dən aşağıdırsa → SAT
• −3%…+3% arası → GÖZLƏ (zəif siqnala tövsiyə verilmir)

3% həddi təsadüfi deyil: 5 illik tarixdə (599 simvol, 743 min bar) aparılmış yoxlama göstərdi ki, yalnız DƏRİN siqnallara əməl etmək həm dəqiqliyi, həm gəlirliliyi artırır. Az amma keyfiyyətli tövsiyə — çox amma zəif tövsiyədən üstündür. Ayrıca, bazar rejimi süzgəci var: tarixən zərərli ölçülmüş (aktiv növü × bazar rejimi) kombinasiyalarda AL/SAT avtomatik GÖZLƏ-yə endirilir.

Etibar səviyyəsi

Texniki siqnal (keçmiş qiymət trendi) proqnozla eyni istiqaməti göstərirsə etibar «güclü» olur. ML proqnozu hələ hazır deyilsə, yalnız texniki siqnal göstərilir və «zəif etibar» nişanı qoyulur. Bir neçə modelin (LSTM, Prophet, GBM, texniki) səsvermə razılığı da ayrıca göstərilir: hamısı razıdırsa «güclü», çoxluq razıdırsa «orta», fikirlər bölünübsə «zəif» konsensus.

Texniki siqnal yalnız keçmiş qiymət hərəkətinə baxır və üç klassik göstəricini birləşdirir. Hər oxunuş bal toplayır; cəm müsbətdirsə AL, mənfidirsə SAT, aralıqdadırsa GÖZLƏ.

• RSI (14 gün): 30-dan aşağı «həddindən çox satılıb» (qalxma ehtimalı), 70-dən yuxarı «həddindən çox alınıb» (düşmə ehtimalı), 50 ətrafı neytral.
• MACD histoqramı: müsbətdirsə yuxarı momentum güclənir, mənfidirsə zəifləyir.
• EMA50: qiymət 50 günlük eksponensial ortalamanın üstündədirsə trend yuxarı, altındadırsa aşağı sayılır.

Texniki siqnal tək başına tövsiyə deyil — yekun qərar ML proqnozu ilə birlikdə formalaşır (yuxarıdakı bölmə).

Qısamüddətli proqnozu 2 qatlı LSTM neyron şəbəkəsi verir. Model qiymətin özünü yox, GÜNDƏLİK DƏYİŞİMLƏRİ (gəlirləri) öyrənir — bu, istiqamət siqnalını daha stabil edir; qiymət yolu proqnoz edilən dəyişimlərdən yenidən qurulur. Orta müddət üçün Prophet modeli ayrıca proqnoz verir.

• Hər aktivin modeli ən azı gündə 1 dəfə yenidən öyrədilir; baxdığın aktivlər hər saat, seçdiyin aktiv isə elə o anda təzələnir.
• Hər öyrətmədə məlumatın son hissəsi kənara qoyulub yoxlama (backtest) aparılır — «etibarlılıq» rəqəmi buradan gəlir.
• Proqnoz zolağı qrafikdə yaşıl qırıq xətlə göstərilir.

Məhdudiyyətlər

Model yalnız qiymət tarixinə baxır: xəbər şoklarını, hesabat sürprizlərini, Fed qərarlarını GÖRMÜR. Buna görə proqnoz ehtimaldır, zəmanət deyil — xəbər/konsensus/fundamental bölmələri ilə birlikdə oxu.

«X mənbə belə görür, Y belə» panelidir — məqsəd bir mənbəyə kor-koranə inanmamaqdır:

• Yahoo analitikləri: Wall Street analitiklərinin al/sat reytinqləri və 12 aylıq hədəf qiymətləri (aşağı/orta/yuxarı).
• Finnhub: analitik tövsiyələrinin müstəqil aqreqasiyası.
• TradingView: texniki göstəricilərin məcmu reytinqi (AL/SAXLA/SAT).
• V Trade ML: bizim öz modelimizin verdikti — müstəqil 4-cü rəy.

Mənbələrin hamısı eyni istiqaməti göstərirsə panel bunu ayrıca qeyd edir. Fikir ayrılığı da özü bir siqnaldır: bazar həmin aktiv barədə əmin deyil.

Hər səhmin profil səhifəsində 6 müstəqil ölçü ayrı-ayrılıqda −1…+1 aralığına gətirilir, ortalaması 1–10 şkalasına çevrilir. 7 və yuxarı güclü, 4 və aşağı zəif sayılır. Metodologiya tam şəffafdır:

• Analitiklərin reytinqi: güclü alış +2, alış +1, satış −1, güclü satış −2 çəkisi ilə normallaşdırılmış bal.
• Xəbər sentimenti: son xəbər başlıqları FinBERT maliyyə dil modeli ilə müsbət/mənfi təsnif edilir.
• Texniki + ML: yuxarıdakı yekun verdiktin skor forması.
• İnsayder fəaliyyəti: şirkət rəhbərlərinin alış/satışları DOLLAR ÇƏKİSİ ilə tutuşdurulur — rəhbər öz pulunu hara qoyur?
• Sosial rəy: StockTwits istifadəçilərinin bull/bear nisbəti (ən azı 5 rəy olduqda).
• Fundamental keyfiyyət: gəlirlilik, borc, artım kimi əmsallardan yığılan 0–100 keyfiyyət balı.

Hər ölçünün öz qövs göstəricisi var; məlumat tapılmayan ölçü sadəcə hesaba qatılmır.

Skaner hər gün bütün universumu üç məşhur treyder şablonu ilə yoxlayır. Şablona düşmək «al» demək deyil — bu, İZLƏMƏYƏ DƏYƏR namizəd siyahısıdır:

• Minervini trend şablonu (M): qiymət > MA50 > MA150 > MA200, MA200 qalxır, 52 həftəlik dibdən ən azı 30% yuxarı, zirvəyə 25%-dən yaxın. Güclü yüksəliş trendinin ortası.
• Weinstein Mərhələ-2 (W): qiymət 150 günlük ortalamanı təzəcə keçib və keçid həftəsində həcm adi həcmdən 1.5 dəfə çoxdur — yığımdan yüksəlişə keçid.
• Darvas qutusu (D): 15–40 gün dar diapazonda (≤12%) sıxılma, sonra həcmli qırılma.

Hər namizəd üçün təxmini Giriş (qırılma səviyyəsi) və Stop (qutu dibi və ya MA50) göstərilir, RS sütunu isə səhmin son ayda SPY-dan nə qədər güclü olduğunu bildirir. Stop-loss qoymadan swing mövqe açmaq olmaz.

• 10G/20G/50G/200G çipləri: qiymət həmin günlük ortalamanın üstündədirsə yaşıl (↑), altındadırsa qırmızı (↓). Qısa çiplər əhval, 200G uzun trend göstəricisidir.
• «Zirvədən −X%»: qiymətin 52 həftəlik zirvədən nə qədər aşağıda olduğu.
• Fib düyməsi: son 1 ilin zirvə-dib aralığının Fibonacci geri çəkilmə səviyyələri (23.6%–78.6%) — treyderlərin izlədiyi ehtimal dayaq/müqavimət xətləri.
• Opsion düyməsi: ən böyük açıq maraqlı call/put strike-ları («divarlar») — qiymətin maqnit kimi cəzb olunduğu və ya ilişdiyi təxmini səviyyələr.
• «Pul içəri/çölə axır»: 20 günlük Chaikin pul axını (CMF) — bağlanışların günün yuxarı/aşağı hissəsində olması + həcm.
• Divergensiya: qiymət yeni zirvə vurur, amma RSI vurmursa (mənfi divergensiya) yüksəliş zəifləyir; tərsi müsbət divergensiyadır.

• Sektor Rotasiyası: 11 SPDR sektor ETF-inin (XLK, XLF, XLE…) S&P 500-ə NİSBİ gücü 1 həftə / 1 ay / 3 ay pəncərələrində. Müsbət rəqəm sektorun bazarı qabaqladığını göstərir — pul oraya axır.
• Growth vs Value: QQQ (texnologiya/artım) ilə IWM (kiçik şirkətlər/dəyər) son ayda kim öndədir — bazarın risk iştahının barometri.
• YTD liderləri: ilin əvvəlindən bəri gətirilər — indekslər, sektorlar və BTC yan-yana.

• Qlobal axtarış: istənilən səhifədə Ctrl+K (və ya başlıqdakı axtarış düyməsi) — simvolu və ya səhifə adını yaz, Enter bas, birbaşa açılır.
• Siqnal lenti (zəng ikonu): Telegram-a gedən bütün xəbərdarlıqların — yeni AL/SAT keçidi, ±5% kəskin hərəkət, sabahkı hesabat xatırlatması, gündəlik simulyasiya xülasəsi — tətbiqdaxili kopiyası. İzləmə siyahına aktiv əlavə etdikcə onun siqnalları sənə ünvanlanır. «Oxunub» vəziyyəti yalnız bu cihazda saxlanılır.
• Müqayisə səhifəsi: 2-3 aktivi yan-yana — qiymət, 30 günlük mini-qrafik, verdikt, proqnoz, həmin simvolda tarixi doğruluq, P/E, dividend, market cap, beta və 52 həftəlik zirvədən məsafə.
• Filtr şablonları + CSV: Filtr səhifəsində qurduğun meyarları adla saxla və bir klikə geri çağır (şablonlar yalnız bu brauzerdə saxlanılır); nəticə cədvəlini CSV faylı kimi Excel-ə çıxart.
• Qiymət alertləri: İcmalda seçdiyin aktiv üçün səviyyə qoy (məs. «$220-ni yuxarı keçəndə») — qiymət ora çatanda bir dəfə bildiriş gəlir: siqnal lentinə və Telegram bağlıdırsa öz çatına. Bir hesabda ən çox 20 açıq alert.
• Qeydlərim: hər simvola şəxsi qeyd yaz («$185-də aldım, hesabata qədər saxla») — yalnız öz hesabında görünür, cihazlar arası sinxronlaşır.
• Şəxsi Telegram: zəng panelindəki «Telegram bağla» düyməsi ilə hesabını botla bağla — izlədiyin aktivlərin siqnalları və qiymət alertlərin birbaşa öz Telegram çatına gəlir.
• Telefonda tətbiq kimi: brauzer menyusunda «Ana ekrana əlavə et» seç — V Trade öz ikonu ilə ayrıca tətbiq kimi açılır və ekranın altında 5 düyməli sürətli naviqasiya görünür.

Hər gün hər aktivin yekun verdikti qeydə alınır. 7 gün keçəndən sonra real qiymətlə tutuşdurulur: AL demişdiksə qiymət qalxıbsa doğru, SAT demişdiksə düşübsə doğru, GÖZLƏ demişdiksə ±0.5% zolağında qalıbsa doğru.

• Nəticələr simvol-simvol, şəffaf hit-rate kimi «Doğruluq» səhifəsində göstərilir.
• Aylıq bölgü cədvəli hər təqvim ayının nəticəsini ayrıca göstərir — ardıcıllıq bir baxışda görünür.
• Keçmişdə çağırışları düz çıxan simvollara Top-5 sıralamasında kiçik üstünlük verilir (bərabər proqnozlar arasında).

18 iyul 2026 — ölçmə qaydası dəyişdi

Bu tarixdə AL/SAT həddi 1.5%-dən 3%-ə qaldırıldı (5 illik yoxlamaya əsasən). Ona görə qrafikdə bu tarixdən əvvəlki və sonrakı dövrlər FƏRQLİ qaydalarla verilmiş tövsiyələri ölçür — iki dövrü birbaşa müqayisə etmək düzgün deyil. Qrafikdə bu nöqtə ayrıca işarələnib.

Niyə əsas rəqəm yalnız AL/SAT-dır

GÖZLƏ verdikti |proqnoz| < 3% olanda verilir, amma doğruluğu ±0.5% zolağı ilə ölçülür — yəni «3%-dən az tərpənəcək» dediyimiz halda səhm 1.2% tərpənsə, bu SƏHV yazılır. İki fərqli hədd. Üstəlik GÖZLƏ ümumiyyətlə istiqamət iddiası deyil: onu AL/SAT ilə eyni faizə yığmaq üç ayrı meyarı bir kəsrə salmaq deməkdir və nəticə riyazi mənasını itirir (eyni +0.3% hərəkət AL üçün də, GÖZLƏ üçün də «doğru» sayıla bilir). Ona görə həm Doğruluq səhifəsində, həm giriş səhifəsindəki canlı zolaqda ƏSAS göstərici yalnız AL/SAT çağırışlarıdır — istifadəçinin əslində əməl etdiyi tövsiyələr.

GÖZLƏ necə hesabat olunur

GÖZLƏ ayrıca, öz iddiasının bandı (±3%) ilə göstərilir və dərhal yanında BAZİS DƏRƏCƏ verilir: bütün tövsiyələr arasında eyni bandda qalanların payı. Xam faiz tək başına aldadıcıdır — geniş bandda qələbə ucuzdur, dar bandda əlçatmazdır. Məlumat daşıyan yeganə rəqəm aradakı fərqdir: «GÖZLƏ dediyimiz hallar bütün hallardan nə qədər çox sakit qaldı».

Brier skoru yalnız AL/SAT üzrədir

GÖZLƏ sətirlərində proqnoz sıfıra yaxın olduğu üçün onların Brier balı avtomatik olaraq təsadüf bazasına (0.25) yaxın çıxır. Qarışığa qatılanda ümumi skoru süni «yaxşılaşdırır», yəni modeli olduğundan daha kalibrli göstərir. Ona görə skor yalnız öhdəlik götürülmüş çağırışlar üzərində hesablanır.

7 günlük ölçmə — 2026-07-28 düzəlişi

Verdiktlər gün ərzində istənilən saatda yazılır, qiymət barları isə gün başlanğıcı ilə damğalanır. Bu səbəbdən 7-ci günün barı «hədəf vaxtdan əvvəl» sayılıb atlanırdı və real ölçmə səssizcə 8–10 günə sürüşürdü. Düzəldildi: hədəf artıq gün sərhədinə yuvarlaqlaşdırılır. Bu tarixdən ƏVVƏL qiymətləndirilmiş çağırışlar 8–10 günlük hərəkətlə ölçülüb — onları sonrakılarla birbaşa müqayisə edərkən bunu nəzərə alın.

Simulyasiya səhifəsindəki virtual $1000 portfel hər gün öz verdiktlərimizə mexaniki əməl edir. Hansı namizədlərin seçiləcəyi bu qaydalarla müəyyənləşir — hər biri tarixi ölçmə ilə təsdiqlənib:

• Yalnız tarixən qazanclı hücrələr: səhm/ETF/indeksdə AL→long, kriptoda SAT→short (107 min ticarətlik araşdırma — əks kombinasiyalar zərərli çıxdı).
• Sektor limiti: hər sektordan (və ya kripto qrupundan) eyni anda ən çox 2 mövqe — bir sektorun pis həftəsi portfeli batırmasın.
• Ekstremal proqnoz istisnası: |proqnoz| ≥ 12% olan namizədlər seçilmir — ölçmə göstərdi ki, modelin ən «əmin» proqnozları ən az düz çıxanlardır.
• Etibar sıralaması: bərabər güclü siqnallar arasında modelin həmin simvolda tarixi doğruluğu yüksək olan üstün tutulur.
• Çıxış: sabit 7 iş günü — stop-loss/take-profit variantlarının hamısı ölçmədə gəlirliliyi AZALTDI, ona görə istifadə olunmur; risk mövqe ölçüsü ilə idarə olunur.

Nəticələr (bağlanan hər ticarət, gündəlik equity, SPY müqayisəsi) Simulyasiya səhifəsində tam şəffaf göstərilir və hər axşam Telegram xülasəsi göndərilir.

Stop-loss və hədəf ATR-ə (Average True Range — son dövrün orta günlük yırğalanması) əsaslanır: volatil səhmə geniş, sakit səhmə dar zolaq qoyulur. AL üçün stop aşağıda/hədəf yuxarıda, SAT üçün əksinə göstərilir.

Bunlar TƏXMİNİ səviyyələrdir — mövqe ölçüsü və risk həddi hər kəsin öz qərarıdır. Ümumi qayda: bir mövqedə portfelin 1–2%-dən çoxunu riskə atmamaq.

• Səhm / ETF / indeks qiymətləri: Yahoo Finance — hər 15 dəqiqədə bütün universum; ~5 illik günlük tarix saxlanılır.
• Kripto: Binance (canlı axın + 2 dəqiqəlik yeniləmə).
• Xəbərlər və analitik tövsiyələr: Finnhub + Yahoo; sentiment FinBERT ilə.
• Texniki reytinq: TradingView; sosial rəy: StockTwits; insayder əməliyyatları: Yahoo.
• ML proqnozları: baxılan aktivlər hər saat, bütün universum günlük rotasiya ilə; siqnallar hər 5 dəqiqədə təzə qiymətlərlə yenilənir.

Universum: S&P 500 + Nasdaq-100 + Dow 30 + 11 sektor ETF-i + dünya indeksləri + kripto top-50 (~630 aktiv). Bazarda kəskin hərəkət edən yeni adlar (gündə maks. 5) avtomatik əlavə olunur.

V Trade şəxsi araşdırma və təhsil alətidir. Burada göstərilən heç nə maliyyə məsləhəti deyil: proqnozlar ehtimaldır, keçmiş nəticələr gələcəyə zəmanət vermir, «Doğruluq» səhifəsindəki hit-rate də daxil. Alqı-satqı qərarını verməzdən əvvəl öz araşdırmanı apar və yalnız itirməyə hazır olduğun məbləğlə risk et.